Центарот за развој на медиумите на заедниците МЕДИУМ од Гостивар, во партнерство со Балканскиот институт за регионална соработка БИРС од Тетово, вчера на 27.09.2017 одржа обука за организациско и професионално јакнење на веб порталите.
На обуката присуствуваа уредници, новинари и претставници на веб портали од Полошкиот и Југозападниот дел на Р. Македонија.
Главната цел на обуката беше зајакнување на капацитетите на онлајн медиумите и подобрување на професионализмот кај истите преку доловување практики и искуства, како и акцентирање на важноста од примена на новинарски техники и методи за професионалност и транспарентност пред реципиентите.
Воедно, следната недела ја најавуваме и втората обука наменета за претставниците на веб порталите од Скопскиот и Североисточниот регион која ќе се одржи на 05.10.2017 (четврток) во ГЕМ Клуб во Скопје.
Обуките ќе придонесат и кон развој на професионалноста на онлајн медиумите при пласирање на информации и сензитивни теми од меѓуетнички карактер. Исто така, резултатите ќе целат кон медиумска саморегулатива, почитување на етичките принципи, како и постигнување на баланс и рамнотежа помеѓу предизвикот кој го нудат новите медиуми и она што го бара вистинското професионално новинарство.
Проектот „Нови медиуми за стари предизвици“ е финансиран и поддржан од Цивика Мобилитас, проект на Швајцарската агенција за развој и соработка (SDC), кој го спроведуваат NIRAS од Данска, Македонскиот центар за меѓународна соработка (МЦМС) и Шведскиот институт за јавна администрација (SIPU).




